Breaking News
Home / Video / සයිබර් ප්‍රහාරයක් එල්ල කර තායිවාන බැංකුවකින් ඩොලර් මිලියන 8ක් ලංකාවට බැරවෙලා

සයිබර් ප්‍රහාරයක් එල්ල කර තායිවාන බැංකුවකින් ඩොලර් මිලියන 8ක් ලංකාවට බැරවෙලා

ජාත්‍යන්තර මුදල් විශුද්ධිකරණ වංචාවක් සම්බන්ධයෙන් අපරාධ පරීක්ෂණ දෙපාර්තමේන්තුව පුද්ගලයෙකු අත්අඩංගුවට ගෙන තිබේ.

මේ ඒ පිළිබඳව සවිස්තර අනාවරණයකි,

තායිවානයේ ෆා ඊස්ටර්න් ජාත්‍යන්තර බැංකුවේ පරිගණක පද්ධතියට නීති විරෝධීව ඇතුලුවී මුදල් සොරා ගැනීමේ සිද්ධියක් සම්බන්ධයෙන් එරට අගමැතිවරයාගේ නියමයෙන් පසුගිය සතියේ පුළුල් විමර්ශනයක් ආරම්භ කෙරිණි.

තායිවාන මාධ්‍ය වාර්තා කළේ, මෙලෙස සොරාගත් අමෙරිකානු ඩොලර් මිලියන 60 ක පමණ මුදල් ශ්‍රී ලංකාව, කාම්බෝජය සහ ඇමෙරිකා එක්සත් ජනපදය වැනි රටවල බැංකු ගිණුම්වලට යවා ඇති බව ය.

ෆා ඊස්ටර්න් ඉන්ටර් නැෂනල් බැංකුවේ අන්තර් බැංකු මූල්‍ය දුරකතන සන්නිවේදන ජාලය හෙවත් ස්විෆ්ට් පද්ධතියට අනවසරයෙන් ඇතුලුවී දුන් නියෝග මගින් මෙම මුදල් වංචාව සිදුකර ඇති බව පසුගිය අඟහරුවාදා මුල් වරට අනාවරණය විය.

එම පද්ධතියෙන් සිදු කරනු ලබන්නේ ලොවපුරා සාමාජිකත්වය දරණ බැංකු අතර අන්තර්ජාලය හරහා ආරක්ෂිතව මුදල් හුවමාරු කිරීමට අදාළ උපදෙස් සන්නිවේදනය කිරීමයි.

මේ අතර තායිවාන ෆා ඊස්ටර්න් බැංකුවෙන් ලංකා බැංකුවේ ජේ. සී නම්මුණි නමැති පුද්ගලයෙකුගේ නමට තිබූ පෞද්ගලික ගිණුමකට ඇමෙරිකානු ඩොලර් මිලියන 1.1 ක මුදලක් බැරවීම පිළිබඳව මෙරට අපරාධ පරීක්ෂණ දෙපාර්තමේන්තුව විමර්ශනයක් ආරම්භ කර තිබේ.

උසස් නිලධාරීවරයෙකු පැවසුවේ, මෙම ගිණුමෙන් හිමිකරු පසුගිය 4 වන දා රුපියල් ලක්ෂ 300 ක මුදලක් ලබා ගෙන තිබූ බවයි.

සිකුරාදා යළි ත් ලංකා බැංකු මූලස්ථාන ශාඛාවෙන් රුපියල් ලක්ෂ 80 ක මුදලක් ලබා ගැනීමට පැමිණි අවස්ථාවේ ජේ. සී නම්මුණි නමැත්තා අපරාධ පරීක්ෂණ දෙපාර්තමේන්තුවේ නිලධාරීන් විසින් අත්අඩංගුවට ගනු ලැබිණි.

අධිකරණයට ඉදිරිපත් කළ සැකකරු ලබන බදාදා දක්වා රක්ෂිත බන්ධනාගාරගත කර ඇත.

මුදල් විශුද්ධිකරණය, පරිගණක අපරාධ, මුදල් වංචා කිරීම හා පරිගණක පද්ධතියකට අයුතු ලෙස ඇතුලුවීම ඇතුලු චෝදනා ගණනාවක් සම්බන්ධයෙන් අපරාධ පරීක්ෂණ දෙපාර්තමේන්තුව අධිකරණයට කරුණු වාර්තා කර තිබිණි.

මේ අතර ජේ. සී නම්මුණි නමැත්තා සමග මුදල් ගැනීමට පැමිණි තව ත් පුද්ගලයකු අත්අඩංගුවට ගැනීම සඳහා බැංකුවේ CCTV දර්ශන ද උපයෝගී කරගනිමින් අපරාධ පරීක්ෂණ දෙපාර්තමේන්තුව විමර්ශනයක් ආරම්භ කර තිබේ.

උසස් නිලධාරියෙකු පැවසුවේ , රාජ්‍ය සමාගමක ප්‍රධානියෙකුවන මෙම පුද්ගලයා මේ වන විට සැඟවී සිටින බවයි.

ඔහු රටින් පිටවීම වැළැක්වීම සඳහා ආගමන විගමන අංශ දැනුවත් කර තිබේ.

පරීක්ෂණ කණ්ඩායම් අධිකරණයට වාර්තා කළේ, අත්අඩංගුවට ගත් ජේ. සී නම්මුනි නමැති සැකකරුගේ කාර්යාලයේ තිබී රුපියල් ලක්ෂ 40 ක මුදලක් සොයා ගත් බව ය.

ඔහුගේ ගිණුම අධිකරණ නියෝග මත මේ වන විට අත්හිටුවා ඇති අතර තායිවානයේ විශේෂ විමර්ශන කණ්ඩායමක් ද ඉදිරි දින කිහිපයේ මෙරටට පැමිණීමට අවශ්‍ය බවට ඉල්ලීමක් කර ඇතැයි උසස් නිලධාරීයෙකු පැවසුවේ ය.

මේ අතර 2016 පෙබරවාරි මාසයේදී ද මෙවැනිම සිදුවීමක් වාර්තා විය,

ඇමෙරිකාවේ නිව්යෝර්ක් නුවර මධ්‍යම සංචිත බැංකුවේ බංගලාදේශයේ පවත්වාගෙන ගිය ගිණුමකින් ඩොලර් බිලියනයකට ආසන්න මුදලක් සොරා ගැනීමට උත්සාහ කර තිබුණි.

එම මුදලින් මිලියන 20 ක් ශාලිකා පදනම නමැති ආයතනයක නමින් මෙරට බැංකුවක ගිණුමකට බැර විය.

මෙවැනි වංචාවලදී පළමුවෙන් ජාත්‍යන්තර බැංකු අතර මුදල් හුවමාරු කරන සන්නිවේදන පද්ධතියක් වන ස්විෆ්ට් පද්ධතියට නීති විරෝධී අයුරින් ඇතුලුවීම සිදු විය.

එය සිදුකරන්නේ තෝරාගත් බැංකුවක සේවකයෙකුට ඊමේල් පණිවිඩයක් යැවීම මගිනි.

එම පණිවිඩය සේවකයා විවෘත කළ විට ඒ සමග එවා ඇති මෘදුකාංගයක් ස්විෆ්ට් පද්ධතියට ඇතුල්වේ.

වංචාකරුවන් පද්ධතියට ඇතුලුවී මුදල් හුවමාරුකිරීම සඳහා අදාළ උපදෙස් ලබාදෙන්නේ මේ මෘදුකාංග හරහා ය.

එහිදී ඇතැම් නියෝග ප්‍රතික්ෂේපවන අතර කිහිපයක් ක්‍රියාත්මකවී වංචාකරුවන් දෙන නියෝග මත ඔවුන්ගේ ගිණුම්වලට ස්වයංක්‍රීව මුදල් හුවමාරුවේ.

මෙහිදී වංචාවක් සිදුවන බවට අනතුරු අඟවන පණිවිඩ පවා ඉතා වේගයෙන් පද්ධතියෙන් මකා දැමීම විශේෂත්වයකි.

කෙසේවෙතත් බංගලාදේශ බැංකු වංචාවේදී මෙරට පදනමට මුදල් බැරවූ අවස්ථාවේ ඩොයිෂේ බැංකුව ගිණුමේ නමේ අකුරු කිහිපයක වෙනසක් හඳුනාගෙන තිබිණි.

එම වංචාව අනාවරණය වූයේ ඒ ඔස්සේ කළ විමසීම්වලින් පසුව ය.

About article14

Check Also

පොහොට්ටු ජනපති අපේක්ෂක ගෝටාගේ නම අවසන් පුරවැසිබාවය අත්හැරපු ලයිස්තුවේත් නැ

‘පොහොට්ටු’ පක්ෂයේ ජනාධිපති අපේක්ෂක ගෝඨාභය රාජපක්ෂ සිය ඇමරිකානු පුරවැසිභාවය ඉවත්කර ගෙන ඇතැයි ඔහුගේ අනුගාමිකයින් කියන …

Leave a Reply

Your email address will not be published. Required fields are marked *

error: Content is protected !!