Breaking News
Home / දේශීය පුවත් / නුවරට පිටින් කණ්ඩායමක් ඇවිත් පිරිස රැස් කලේ සමාජජාල වලින්. දැන් අවහිර කල නිසා FB එන්නේ 1% කටත් අඩුවෙන්ලු

නුවරට පිටින් කණ්ඩායමක් ඇවිත් පිරිස රැස් කලේ සමාජජාල වලින්. දැන් අවහිර කල නිසා FB එන්නේ 1% කටත් අඩුවෙන්ලු

සමාජ ජාල මාධ්‍ය භාවිතය අතින් ශ්‍රී ලංකාවේ පළමු ස්ථානය හිමිකර ගන්නේ ෆේස්බුක් අඩවියයි
ශ්‍රී ලංකාවේ සමාජ ජාල මාධ්‍ය අවහිර කරනු ලැබීමත් සමඟ මාර්තු අට වෙනිදා මධ්‍යාහ්නයේ පටන් රට තුළ සන්නිවේදන කටයුතු අඩාල වී ඇතැයි සමාජ ජාල මාධ්‍ය පර්යේෂකයන් පවසයි.

මහනුවර ප්‍රදේශයේ ගැටුම් ගැන කටකතා පැතිර යමින් පවතින අතරවාරයේ ව්‍යාජ ප්‍රකාශන පතුරුවා හැරීම සඳහා සමාජ ජාල මාධ්‍ය උපයෝගී කර ගන්නා බවට තොරතුරු ලැබීමෙන් අනතුරුව ආණ්ඩුවේ නියෝගය පරිදි ඊට අවහිර කිරීමට ශ්‍රී ලංකා විදුලි සංදේශ නියාමන කොමිසම විසින් පියවර ගනු ලැබුණි.

ඒ සම්බන්ධයෙන් නිවේදනයක් නිකුත් කරන විදුලි සංදේශ ඇමති හරින් ප්‍රනාන්දු, ශ්‍රී ලංකා විදුලි සංදේශ නියාමන කොමිෂන් සභාව විසින් ගෙන ඇති වාරණ තීන්දුව විස්තර කළේ “අතිවිශේෂ එහෙත් තාවකාලික” පියවරක් හැටියටය.

“මිනිසුන් එක්තැන් කිරීම සඳහා නිමැවුණ තාක්ෂණයක් මිනිසුන් වෙන්කොට ඇද ගැනීම සඳහා භාවිත කෙරෙන ආකාරය පසුගිය දින කීපයේදී දකින්නට ලැබුණ” බවත් හරීන් ප්‍රනාන්දු ඇමතිවරයා සඳහන් කර ඇත.

එම තාවකාලික වාරණයත් සමග, ශ්‍රී ලංකාව තුළ ‘ෆේස්බුක්’ ගිනුම් හිමියන්ට ඔවුන්ගේ අඩවිවලට පිවිසීමට නොහැකි තත්වයක් උදාවෙවේ ඇත.

සමස්ත දිවයින ආවරණය කෙරෙන මට්ටමින් සහ සියලු සමාජ ජාල මාධ්‍යයන්ට බල පැවැත්වෙන මට්ටමින් ශ්‍රී ලංකාව තුළ මෙවැනි අවහිර කිරීමක් සිදු වූ පළමු අවස්ථාව මෙය වේ.

“මෙහෙම දෙයක් වුණේ පළමු වතාවට. ලංකාවේ සමාජ ජාල මාධ්‍ය ඉතිහාසයේ පමණක් නොවෙයි, අන්තර්ජාල ඉතිහාසයේත් මෙවැන්නක් වාර්තා වුණේ පළමු වතාවටයි. මීට පෙර අන්තර්ජාල සබඳතා බිඳ වැටුණ අවස්ථා කීපයක් තියෙනවා. ඒත් ඒවා සිද්ධ වුණේ තාක්ෂණික හේතු නිසා. ඒවා සිදු වුනෙත් 2000 වසරට පෙර. දෙදාහෙන් පස්සේ මෙවැනි බිඳ වැටීමක් සිදු වූ පළමු වතාව මෙයයි

ශ්‍රී ලංකාව තුළ මේ දිනවල පවතින ගැටුම්කාරී තත්වය හමුවේ මේ අවහිර කරනු ලැබීම පිළිබඳව අන්තර්ජාල ග්‍රාහකයන් තමවත් නිශ්චිත මත පළ කිරීමක් නොකරන බවත් සමාජ ජාල මාධ්‍ය පර්යේෂක චානුක වත්තේගම පවසයි.

මේ අවහිර කරනු ලැබීම අන්තර්ජාල පුවත්පත්වලට පිවිසීම කෙරෙහිත් බලපෑ ඇති බව ඔහු කියා සිටියි.

කෙසේවුවද, මෙවැනි අවහිර කිරීම සිදු කෙරුණත් අන්තර්ජාලයට සහ සමාජ ජාල මාධ්‍යයට පිවිසීම සඳහා වෙනත් විධීන් ඇති බවත් සමාජ ජාල මාධ්‍ය පර්යේෂක චානුක වත්තේගම පිළිගනියි.

එහෙත් එවැනි වෙනත් විධි උපයෝගී කර ගනිමින් සමාජ ජාල මාධ්‍යයට පිවිසෙන ශ්‍රී ලාංකිකයන්ගේ සංඛ්‍යාව 1% කටත් අඩු බව ඔහුගේ තක්සේරුව වෙයි.

සමාජ ජාල මාධ්‍ය පර්යේෂක චානුක වත්තේගම පවසන පරිදි ඊට හේතුව ඒ සඳහා අවශ්‍ය තාක්‍ෂණික ඥානය බොහෝ දෙනකුට නොමැතිවීමය.

කෙසේවුවද, අන්තර්ජාලයට පිවිස ‘you tube’ වැනි අංශ පරිශීලනයට තවමත් බාධාවක් නැති බවත් චානුක වත්තේගම පෙන්වා දෙයි.

සමාජ ජාල මාධ්‍යයට අවහිර කිරීම මිනිස් අයිතිවාසිකම් වලට පටහැණි යයි තර්කයක් ගොඩ නැගිය හැකි වුනත්, පවතින ගැටුම්කාරී තත්වය තවත් උග්‍ර කිරීම සඳහා ඇතැම් කොටස් සමාජ ජාල මධ්‍ය පාවිච්චි කරන හෙයින් ඊට විකල්ප මතයක් ගොඩ නැගෙන බව සමාජ ජාල මාධ්‍ය පර්යේෂක චානුක වත්තේගම පවසයි.

වාරණය අවශ්‍ය සහ අනවශ්‍ය අවස්ථා තිබේද?

“මහනුවර තත්වය නරක අතට හැරෙමින් තිබියදී එම ප්‍රදේශයේ ජීවත් නොවෙන පිටින් පැමිණි පිරිසක් කණ්ඩායම් ගැසීම සඳහා පුද්ගලයන් එකතු කර ගැනීමට සමාජ ජාල මාධ්‍ය පාවිච්චි කරන හැටි අපි දැක්කා. ඉතින් එවැනි අවස්ථාවක ආණ්ඩුවලට කලබල නතර කිරීමට මෙවැනි ආන්තික පියවර ගන්න සිද්ධ වෙනවා” චානුක වත්තේගම සඳහන් කරයි.

එවැනි අවස්ථාවක මානව හිමිකම් මෙන්ම අනිත් අතින් රටේ පවතින තත්වයත් සැලකිල්ලට ගැනීමට සිදුවෙන බව ඔහු පෙන්වා දෙයි.

(BBCඇසුරෙණි.)

About lanka

Check Also

අද ලැබුන තීන්දුව සමග මහින්ද අගමැතිධුරයෙන් ඉල්ලා අස්වීමට සුදානම් බව පැතිර යන ආරංචියේ ඇත්ත නැත්ත ගැන ඔහුගේ පුත් නාමල්ගෙන් ප්‍රකාශයක්

පාර්ලිමේන්තුව විසුරුවා මහ මැතිවරණයක් කැඳවීම සඳහා ජනාධිපතිවරයා විසින් නිකුත් කරන ලද ගැසට් නිවේදනය ක්‍රියාත්මක කිරීම …

Leave a Reply

Your email address will not be published. Required fields are marked *

error: Content is protected !!